Baliarraingo Ostatua
Andra Mari Zeruratzearen Plaza, 20259 Baliarrain, Gipuzkoa
943 788 710
Zartagik bertako eta sasoiko produktuetan oinarritutako sukaldaritza eskaintzen du, bost mendetik gorako historia duen eraikin batean.
Sareari buruz
Ostatu batean sartzea Gipuzkoa ulertzeko modu batean sartzea da. Gastronomia solasaldiekin nahasten den lekuak dira, paisaia eta bertako produktuak mahairaino iristen diren tokiak, eta oraindik gure herrietako bizitzaren zati handi bat partekatzen den espazioak. Bakoitzak bere nortasuna, historia eta harrera egiteko modua ditu, baina guztiek partekatzen dute funtsezko zerbait: lurraldearekiko lotura, komunitatea, abegikortasuna eta sustraiak dituen gastronomia.
Hortik sortu da Gipuzkoako Ostatuen Turismo Sarea, Gipuzkoako Ostalaritzako Enpresarien Elkarteak eta Gipuzkoako Foru Aldundiak bultzatutako ekimena, izaera partekatu horri balioa emateko eta bisitatzen gaituztenei hurbiltzeko. 16 ostaturen inguruan ehuntzen hasi den sarea. Sare bizia eta askotarikoa, lurraldetik sortua, Gipuzkoa bertako herrien, mahaien eta horiei bizia ematen dietenen bidez ezagutzeko.
Zer da ostatu bat?
Ostatu terminoa euskaratik dator, eta tradizioz janaria eta ostatu hartzeko aukera eskaintzen duten establezimenduak izendatu izan ditu. Haren jatorria Gipuzkoa zeharkatzen zuten antzinako komunikazio-bideei eta Behe Erdi Aroan lurraldeko hiribilduak eta bideak sendotzeari lotuta dago.
Mendeetan zehar, espazio horiek eginkizun ekonomiko eta sozial garrantzitsua bete zuten, bidaiariak, merkatariak eta bizilagunak hartuz. Denborarekin, horietako asko udal-titulartasuneko establezimendu bihurtu dira; haien ustiapena lizitazio bidez esleitzen zaie kudeatzaile pribatuei, enpresa-jarduera eta zerbitzu publikorako bokazio argia uztartuz.
Ostalaritza-eginkizunaz harago, askotan komunitatearen eguneroko bizitzari laguntzen diote: eskola txikientzako otorduak prestatzen dituzte, inguruko enpresei zerbitzua ematen diete edo premia biziko oinarrizko produktuen salmenta errazten dute. Horregatik, gizarte- eta lurralde-kohesiorako funtsezko espazioak izaten jarraitzen dute, landa-udalerrien benetako ardatz gisa: elkartzeko, harremanak egiteko eta tokiko bizitza dinamizatzeko lekuak.
Zer esan nahi du gure logoak?
Ostatuak ateak zabalik eta mahaia prest dituzten lekuak dira; herritarrak eta bisitariak elkartzen diren espazioak, eta Gipuzkoa ezagutzeko esperientziaren abiapuntuak.
Logotipoaren oinarria arku formako ate bat da, euskal arkitektura tradizionalean inspiratua. Ate handi hori, aldi berean, hainbat ate txikik osatzen dute: ostatu bakoitzaren ateek. Ostatu baten atea zeharkatzea Gipuzkoarik benetakoenean sartzea da; bertako herriak, paisaiak, gastronomia eta jendea ezagutzeko bidea irekitzea.
Ate horiek ostatuetako mahai luzeak ere ekartzen dituzte gogora, eta Erdi Aroko torloju tradizionalen formako 3 izarrez apainduta daude; izar horiek mahaietako platerak edo ateetako heldulekuak nahiz torlojuak irudika ditzakete.
Horrela, irudi bakar batean biltzen dira Gipuzkoako Ostatu Sarearen kontzeptu nagusiak: atea eta harrera, mahaia eta topaketa.
Arakatu ostatuak
Aukeratu mapako marka bat ostatu bakoitzari buruz gehiago jakiteko.
Arakatu ostatuak
Sustatzaileak
